“É inadmisíbel a indiferenza da Xunta na protección de Meirás”
“É inadmisíbel a indiferenza da Xunta na protección de Meirás. Toda a responsabilidade recae nestes días decisivos sobre o conselleiro de Cultura, Román Rodríguez, e todo o movemento memorialístico do país estalle a pedir que actúe, que colla o catálogo de bens móbeis do Pazo, que o publique no DOGA e garanta a protección de todos eses bens contra a rapina dos Franco. Así de simple, así de rápido. Pero non o fai, e por riba enlama o debate para non se mover. E se non se move, tempo que perde a loita pola memoria democrática deste país e tempo que gañan os Franco. De que parte está Román Rodríguez? Quedar quieto é avalar a impunidade”, afirma Carlos Babío, portavoz da Iniciativa Defende Meirás, que sumou máis de mil sinaturas nunha petición de apoio nas Redes e centos de adhesións das memorias de Galiza para impedir que os Franco consumen un novo espolio en Meirás.
A Iniciativa Defende Meirás lémbralle a Román Rodríguez que está nas súas mans aumentar o nivel de protección dos bens que contén o Pazo de Meirás e denuncia o intento do conselleiro de Cultura de desviar a atención sobre as súas responsabilidades na defensa dun espazo e duns bens que recuperou a mobilización da sociedade galega e, detrás, das institucións democráticas do país, tal e como subliñou a xuíza na sentenza que a finais de 2020 obrigou aos Franco a entregar as chaves.
A Iniciativa Defende Meirás,
que xa mostrou as súas críticas coa tardanza e a timidez do Estado en
reaccionar diante da ameaza dos Franco de retirar bens móbeis de Meirás,
considera que na cuestión da ampliación da protección deses bens a través da
figura do BIC a posición do Estado é “impecábel”, en palabras de Babío. “O
único que fai o Estado é dicirlle á Xunta que exerza as súas competencias. O
mesmo que lle reclama a sociedade civil galega desde o movemento memorialista”,
insiste Babío. E engade: “non se entende que a mesma Administración que acaba
de incoar o procedemento de declaración de BIC para a biblioteca de Pardo Bazán
que está no Pazo, non actúe coa mesma dilixencia para protexer o resto de bens,
e veña dicindo que ten que firmar un convenio do Estado para facelo, cando non
precisou de convenio ningún para protexer o legado de Pardo Bazán”.
“En que quedamos? Hai bens que interesa protexer e bens que non interesa para lles facilitar os Franco o novo espolio? Ou do que se trata e de liar até o infinito o debate sobre Meirás para que non podamos avanzar na súa resignificación como espazo de memoria e a súa incorporación definitiva á memoria democrática do pobo galego?”, pregúntase Babío.
A Iniciativa Defende Meirás
convocará para o 19 de xuño unha mobilización cidadá no Pazo de Meirás para
mostrar a forza da reivindicación da sociedade sadense, coruñesa e galega.
Comentarios
Publicar un comentario